ܛܘܼܪܵܦܵܐ (ܡܲܫܝܲܡܬܵܐ) ܘܫܲܒܼܪܹܐ ـ ܢܲܨܝܼܗܲܬܹܐ ܩܵܐ ܐܲܒܼܵܗܹܐ (Assyrian)

ܕܵܐܟܼܝܼ ܟܹܐ ܗܵܘܹܐ ܗܘܼܦܵܟܼ ܥܒܼܵܕܵܐ ܕܫܲܒܼܪܹܐ ܠܛܘܼܪܵܦܵܐ

ܥܸܢܝܵܢܵܐ ܕܚܲܕ ܫܲܒܼܪܵܐ ܠܚܲܕ ܢܸܣܝܵܢܵܐ ܡܲܥܝܸܩܵܢܵܐ ܕܠܸܒܵܐ ܝܲܢ ܡܲܙܕܸܥܝܵܢܵܐ ܡܵܨܹܐ ܕܬܵܠܹܐ ܥܲܠ:

• ܥܘܼܡܪܵܐ ܕܕܝܼܲܝܗܝ
• ܦܲܪܨܘܿܦܵܝܘܼܬܵܐ ܕܕܝܼܲܝܗܝ
• ܕܵܐܟܼܝܼ ܐܲܚܬܘܿܢ ܝܲܢ ܒܲܝܬܘܼܬܵܘܟܼܘܿܢ ܡܲܚܙܘܼܝܹܐ ܝܬܘܿܢ ܗܘܼܦܵܟܼ ܥܒܼܵܕܵܘܟܼܘܿܢ

ܫܲܒܼܪܵܘܟܼܘܿܢ ܒܲܠܟܵܐ ܠܵܐ ܡܲܚܙܹܐ ܠܹܗ ܗܘܼܦܵܟܼ ܥܒܼܵܕܹܗ ܐܲܝܟܼ ܕܐܲܚܬܘܿܢ ܒܸܣܒܵܪܵܐ ܝܬܘܿܢ. ܐܵܢܝܼ ܒܲܠܟܵܐ ܗܵܘܝܼ:

• ܓܪܝܼܫܘܿܗܿ ܓܵܢܲܝܗܝ ـ ܐܵܢܝܼ ܒܲܠܟܵܐ ܠܵܐ ܗܵܘܝܼ ܠܗܘܿܢ ܣܵܘܕܵܐ ܕܫܲܪܸܟܝܼ ܓܵܘ ܥܵܒܼܘܿܕܘܼܝܵܬܹܐ. ܐܵܢܝܼ ܒܲܠܟܵܐ ܐܵܦ ܗܵܘܝܵܐ ܗܲܝܡܵܢܘܼܬܲܝܗܝ ܒܓܵܢܲܝܗܝ ܒܘܼܫ ܒܨܝܼܪܬܵܐ، ܗܵܘܝܼ ܫܬܝܼܩܹܐ، ܝܲܢ ܕܵܥܪܝܼ ܠܐܘܼܪܚܵܬܹܐ ܕܡܲܚܙܵܝܬܵܐ ܕܕܘܼܒܵܪܹܐ ܒܥܸܕܵܢܵܐ ܕܐܵܢܝܼ ܝܼܗܘܵܘ ܚܲܕ ܛܸܦܠܵܐ.
• ܒܠܝܼܓܹܐ ܡܼܢ ܩܵܕ݉ܡ ܥܸܕܵܢܵܐ ـ ܐܵܢܝܼ ܒܲܠܟܵܐ ܣܵܢܩܝܼ ܕܚܲܝܝܼ ܠܹܗ ܢܸܣܝܵܢܵܐ ܚܕܵܐ ܓܵܗܵܐ ܐ݉ܚܹܪ݉ܬܵܐ. ܩܵܐ ܛܘܼܦ̮ܣܵܐ، ܒܐܘܼܪܚܵܐ ܕܛܲܐܲܠܬܵܐ ܬܢܝܼܬܵܐ ܝܲܢ ܓܪܵܫܬܵܐ ܕܨܘܼܪܝܵܬܹܐ. ܫܲܒܼܪܵܘܟܼܘܿܢ ܒܲܠܟܵܐ ܗܵܘܹܐ ܙܸܕܥܝܵܐ ܒܘܼܬ ܩܲܘܲܡܝܵܬܹܐ ܕܲܥܬܝܼܕܵܝܹܐ ܝܲܢ ܒܲܠܟܵܐ ܗܵܘܝܼ ܠܹܗ ܚܸܠܡܵܢܹܐ ܡܲܙܕܸܥܝܵܢܹܐ.
• ܠܗܝܼܩܹܐ ـ ܐܵܢܝܼ ܒܲܠܟܵܐ ܗܵܘܹܐܠܗܘܿܢ ܩܸܛܪܹܐ ܒܩܲܢܛܪܲܢܬܵܐ ܕܪܸܥܝܵܢܲܝܗܝ ܝܲܢ ܒܡܲܨܝܲܬܵܐ. ܐܵܢܝܼ ܒܲܠܟܵܐ ܒܵܥܝܼ ܕܗܵܘܝܼ ܩܘܼܪܒܵܘܟܼܘܿܢ ܒܟܠ ܥܸܕܵܢܵܐ، ܗܵܘܝܼ ܠܗܘܿܢ ܩܸܛܪܹܐ ܕܡܵܟܼܬܵܐ ܝܲܢ ܣܵܩܕܝܼ ܒܗܲܣܵܢܵܝܘܼܬܵܐ.
• ܗܵܘܝܼ ܡܸܪܥܝܹܐ ـ ܐܵܢܝܼ ܒܲܠܟܵܐ ܗܵܘܝܼ ܠܗܘܿܢ ܡܲܪܥܹܐ ܕܪܹܫܵܐ ܘܡܲܪܥܹܐ ܕܣܬܘܼܡܟܵܐ.

ܫܲܒܼܪܵܘܟܼܘܿܢ ܒܲܠܟܵܐ ܗܵܘܹܐܠܹܗ ܚܲܕ ܗܘܼܦܵܟܼ ܥܒܼܵܕܵܐ ܡܥܘܼܪܩܸܠܵܐ. ܚܲܕܟܡܵܐ ܫܲܒܼܪܹܐ ܒܲܠܟܵܐ ܡܲܒܝܸܢܝܼ ܕܟ̰ܘܼ ܡܸܢܕܝܼ ܠܲܝܬ ܒܝܼܲܝܗܝ، ܐܝܼܢܵܐ ܡܵܨܝܼ ܕܡܲܚܙܝܼ ܗܘܼܦܵܟܼ ܥܒܼܵܕܵܐ ܡܼܢ ܒܵܬ݉ܪ ܝܵܘܡܵܢܹܐ، ܫܵܒܼܘܿܥܹܐ ܝܲܢ ܝܲܪܚܵܐ.

ܕܵܐܟܼܝܼ ܠܗܲܡܙܘܼܡܹܐ ܒܘܼܬ ܚܕܵܐ ܩܲܘܲܡܬܵܐ ܛܘܼܪܵܦܵܝܬܵܐ (ܡܲܫܝܸܡܵܢܬܵܐ)

ܒܸܕ ܗܲܝܸܪܵܐ ܩܵܐ ܫܲܒܼܪܵܘܟܼܘܿܢ ܐܸܢ ܐܲܚܬܘܿܢ ܗܵܘܝܼܬܘܿܢ ܫܲܪܝܼܪܹܐ ܥܲܡܲܝܗܝ. ܐܲܚܬܘܿܢ ܡܵܨܝܼܬܘܿܢ:

• ܐܲܟܸܕܝܼܬܘܿܢ ܩܵܐ ܫܲܒܼܪܵܘܟܼܘܿܢ ܕܐܵܢܝܼ ܝܼܢܵܐ ܣܲܠܵܡܲܬ ܘܕܩܲܘܲܡܬܵܐ ܦܪܝܼܩܠܵܗܿ. ܐܲܚܬܘܿܢ ܒܲܠܟܵܐ ܣܵܢܩܝܼܬܘܿܢ ܕܐܲܟܸܕܝܼܬܘܿܢ ܩܵܐ ܫܲܒܼܪܵܘܟܼܘܿܢ ܪܵܒܵܐ ܓܵܗܹܐ.
• ܡܲܫܡܸܥܡܘܼܢ ܠܫܲܒܼܪܵܘܟܼܘܿܢ. ܡܲܫܡܸܥܡܘܼܢ ܠܢܸܓܵܪܵܢܘܼܝܵܬܹܐ ܘܪܓܼܵܫܝܵܬܹܐ ܕܕܝܼܲܝܗܝ ܒܩܸܫܝܘܼܬܵܐ.
• ܫܒܼܘܿܩܘܼܢ ܫܲܒܼܪܵܘܟܼܘܿܢ ܕܝܵܕܥܝܼ ܕܐܲܚܬܘܿܢ ܒܵܥܝܼܬܘܿܢ ܕܫܵܡܥܝܼܬܘܿܢ ܒܘܼܬ ܕܵܐܟܼܝܼ ܐܵܢܝܼ ܝܼܢܵܐ ܒܸܪܓܼܵܫܵܐ.
• ܐ݉ܡܘܿܪܘܼܢ ܩܵܐ ܫܲܒܼܪܵܘܟܼܘܿܢ ܒܘܼܬ ܡܘܿܕܝܼ ܩܘܼܘܸܡܠܹܗ ܒܚܕܵܐ ܐܘܼܪܚܵܐ ܕܠܚܝܼܡܬܵܐ ܝܠܵܗܿ ܥܲܡ ܥܘܼܡܪܵܐ ܕܕܝܼܲܝܗܝ. ܡܲܦܠܸܚܘܼܢ ܠܸܫܵܢܵܐ ܕܐܵܢܝܼ ܦܲܪܡܝܼܠܹܗ. ܐܸܢ ܫܲܒܼܪܵܘܟܼܘܿܢ ܠܹܐ ܝܵܕܥܹܐ ܠܫܪܵܪܹܐ ܐܸܣܵܝܹܐ، ܐܵܢܝܼ ܒܲܠܟܵܐ ܓ̰ܪܒܝܼ ܕܦܲܪܡܝܼ ܠܡܘܿܕܝܼ ܩܘܼܘܸܡܠܹܗ ܒܓܵܢܲܝܗܝ. ܐܵܢܝܼ ܡܵܨܝܼ ܡܲܦܠܸܚܝܼ ܠܨܲܠܡܲܢܬܲܝܗܝ ܝܲܢ ܠܡܵܘܕܥܵܢܘܼܬܵܐ ܡܩܘܼܝܸܨܬܵܐ ܠܡܲܟܡܲܠܬܵܐ ܕܩܸܣܲܬ. ܐܵܗܵܐ ܒܲܠܟܵܐ ܡܲܒܪܹܐ ܢܸܓܵܪܵܢܘܼܬܵܐ ܘܫܲܘܲܫܬܵܐ ܒܘܼܫ ܙܵܘܕܵܐ ܩܵܐ ܫܲܒܼܪܵܘܟܼܘܿܢ.
• ܐܲܟܸܕܘܼܢ ܕܫܲܒܼܪܵܘܟܼܘܿܢ ܝܵܕܥܹܐ ܕܠܹܐ ܝܠܵܗܿ ܓܢܵܗܵܐ ܕܕܝܼܲܝܗܝ. ܐܵܢܝܼ ܒܲܠܟܵܐ ܚܵܫܒܼܝܼ ܗܵܕܟܼܵܐ ܐܸܢ ܐܵܢܝܼ ܗܘܹܝܹܐ ܝܢܵܐ ܫܘܼܡܵܢܹܐ ܝܲܢ ܚܫܝܼܒܼܹܐ ܝܢܵܐ ܡܸܢܕܝܼܵܢܹܐ ܠܵܐ ܨܦܵܝܝܼ ܒܘܼܬ ܚܲܕ ܦܲܪܨܘܿܦܵܐ.
• ܗܲܡܙܸܡܘܼܢ ܒܘܼܬ ܩܲܘܲܡܬܵܐ ܐܲܝܟܼ ܚܕܵܐ ܒܲܝܬܘܼܬܵܐ. ܫܒܼܘܿܩܘܼܢ ܟܠܚܲܕ ܗܲܕܵܡܵܐ ܕܐܵܡܹܪ ܡܸܢܕܝܼ ܕܐܝܼܬܠܹܗ، ܒܸܚܒܼܵܫܵܐ ܫܲܒܼܪܹܐ. ܐܵܗܵܐ ܟܹܐ ܗܲܝܸܪ ܟܠܚܲܕ ܕܪܵܓܼܹܫ ܕܦܝܼܫܵܐ ܝܠܹܗ ܣܢܝܼܕܵܐ، ܫܸܡܥܝܵܐ ܘܦܘܼܪܡܸܝܵܐ.
• ܗܲܡܙܸܡܘܼܢ ܥܲܡ ܫܲܒܼܪܵܘܟܼܘܿܢ ܒܘܼܬ ܕܵܐܟܼܝܼ ܐ݉ܢܵܫܹܐ ܒܲܠܟܵܐ ܡܲܚܙܝܼ ܥܸܢܝܵܢܲܝܗܝ ܠܥܝܼܩܘܼܬܵܐ ܕܠܸܒܵܐ. ܡܲܕܸܥܡܘܼܢ ܠܗܘܿܢ ܕܪܓܼܵܫܝܵܬܹܐ ܕܕܝܼܲܝܗܝ ܝܼܢܵܐ ܥܝܵܕܵܝܹܐ ܓܵܘ ܕܐܲܢܹܐ ܐܲܗܘܵܠܵܬܹܐ. ܐܲܚܬܘܿܢ ܡܵܨܝܼܬܘܿܢ ܕܐܲܟܸܕܝܼܬܘܿܢ ܩܵܐܠܲܝܗܝ ܕܐܵܢܝܼ ܒܸܕ ܪܵܓܼܫܝܼ ܒܘܼܫ ܨܦܵܝܝܼ ܒܥܒܼܵܪܬܵܐ ܕܥܸܕܵܢܵܐ.

ܕܵܐܟܼܝܼ ܐܲܚܬܘܿܢ ܡܵܨܝܼܬܘܿܢ ܥܵܢܝܼܬܘܿܢ ܠܚܕܵܐ ܩܲܘܲܡܬܵܐ ܛܘܼܪܵܦܵܝܬܵܐ

ܗܘܼܦܵܟܼ ܥܒܼܵܕܹܐ ܕܕܝܼܵܘܟܼܘܿܢ ܠܪܓܼܵܫܝܵܬܹܐ ܘܕܘܼܒܵܪܵܐ ܕܫܲܒܼܪܵܘܟܼܘܿܢ ܒܸܕ ܗܵܘܹܐܠܗܘܿܢ ܟܵܐܪ ܥܲܠ ܒܣܵܡܬܲܝܗܝ. ܐܵܢܲܢܩܵܝܬܵܐ ܝܠܵܗܿ ܕ:

• ܗܵܘܝܼܬܘܿܢ ܦܲܪܡܸܝܵܢܹܐ ܠܫܘܼܚܠܵܦܹܐ ܓܵܘ ܕܘܼܒܵܪܲܝܗܝ. ܫܲܒܼܪܹܐ ܟܹܐ ܗܵܘܹܐܠܗܘܿܢ ܗܘܼܦܵܟܼ ܥܒܼܵܕܹܐ ܠܩܲܘܲܡܝܵܬܹܐ ܡܲܥܝܸܩܵܢܹܐ ܕܠܸܒܵܐ ܝܲܢ ܡܲܙܕܸܥܵܢܹܐ ܒܐܘܼܪܚܵܬܹܐ ܦܪܝܼܫܹܐ. ܫܘܼܚܠܵܦܹܐ ܓܵܘ ܕܘܼܒܵܪܵܐ ܕܕܝܼܲܝܗܝ ܐܲܝܟܼ ܢܵܘܒܹܐ ܕܟܲܪܒܵܐ ܝܲܢ ܡܲܬܪܵܝܬܵܐ ܕܬ݉ܫܘܝܼܬܵܐ ܕܕܝܼܲܝܗܝ ܝܼܠܹܗ ܚܲܕ ܡܸܢܕܝܼ ܥܝܵܕܵܝܵܐ.
• ܝܗܵܒܼܠܗܘܿܢ ܒܵܠܵܐ ܒܘܼܫ ܙܵܘܕܵܐ ܩܵܐ ܫܲܒܼܪܵܘܟܼܘܿܢ. ܐܵܗܵܐ ܒܲܠܟܵܐ ܗܵܘܹܐ ܐܵܢܲܢܩܵܝܵܐ ܒܥܸܕܵܢܵܐ ܕܕܡܵܟܼܬܵܐ ܘܒܥܸܕܵܢܵܬܹܐ ܐ݉ܚܹܪ݉ܢܹܐ ܕܦܪܵܫܬܵܐ.
• ܛܠܘܿܒܘܼܢ ܗܲܝܲܪܬܵܐ ܩܵܐ ܓܵܢܵܘܟܼܘܿܢ. ܫܲܒܼܪܹܐ ܟܹܐ ܣܵܒܪܝܼ ܡ̣ܢ ܐܲܒܼܵܗܲܝܗܝ ܝܲܢ ܢܲܛܪܵܢܲܝܗܝ ܩܵܐ ܕܦܲܪܡܝܼ ܠܚܲܕ ܐܘܼܠܨܵܢܵܐ ܘܡܲܚܙܝܼ ܥܸܢܝܵܢܵܐ ܐܸܠܹܗ. ܐܵܢܝܼ ܣܢܝܼܩܹܐ ܝܢܵܐ ܠܟܡܝܼܠܹܐ ܒܫܸܢܹܐ ܕܝܼܢܵܐ ܠܚܲܕܸܪܘܵܢܲܝܗܝ ܩܵܐ ܕܦܲܪܡܝܼ ܠܙܕܘܼܥܝܵܬܹܐ ܕܕܝܼܲܝܗܝ ܘܥܵܒܼܕܝܼ ܠܗܘܿܢ ܪܵܗܲܬ. ܐܸܢ ܐܲܚܬܘܿܢ ܐܝܼܬܠܵܘܟ݂ܘܿܢ ܥܝܼܩܘܼܬܵܐ ܕܠܸܒܵܐ، ܡܵܨܝܼܬܘܿܢ ܐܵܦ ܐܲܚܬܘܿܢ ܕܩܵܢܝܼܬܘܿܢ ܣܢܵܕܬܵܐ. ܐܸܢ ܠܵܐ ܩܢܹܐܠܵܘܟܼܘܿܢ ܣܢܵܕܬܵܐ، ܐܲܝܵܐ ܡܵܨܝܵܐ ܕܡܲܙܝܸܕܵܐ ܠܙܕܘܼܥܬܵܐ ܘܠܥܝܼܩܘܼܬܵܐ ܕܠܸܒܵܐ ܕܫܲܒܼܪܵܘܟܼܘܿܢ ܒܸܪܓܼܵܫܵܐ ܝܠܹܗ.
• ܗܲܡܙܸܡܘܼܢ ܒܘܼܬ ܪܓܼܵܫܝܵܬܹܐ ܕܕܝܼܵܘܟܼܘܿܢ ܒܚܕܵܐ ܐܘܼܪܚܵܐ ܠܚܝܼܡܬܵܐ ܥܲܡ ܫܲܒܼܪܵܘܟܼܘܿܢ. ܐܲܝܵܐ ܒܸܕ ܗܲܝܸܪܵܐ ܠܗܘܿܢ ܕܗܲܡܙܸܡܝܼ ܒܘܼܬ ܪܓܼܵܫܝܵܬܹܐ ܕܕܝܼܲܝܗܝ.
• ܕܟܼܘܿܪܘܼܢ ܕܟܠܚܲܕ ܝܼܠܹܗ ܦܪܝܼܫܵܐ ܡܼܢ ܚܲܕ ܐ݉ܚܹܪ݉ܢܵܐ ܘܒܲܠܟܵܐ ܗܵܘܝܼ ܠܹܗ ܪܓܼܵܫܝܵܬܹܐ ܦܪܝܼܫܹܐ. ܠܵܐ ܣܵܒܪܝܼܬܘܿܢ ܕܫܲܒܼܪܵܘܟܼܘܿܢ ܪܵܓܼܹܫ ܗܲܪ ܒܗܿܝ ܐܘܼܪܚܵܐ ܕܐܲܚܬܘܿܢ ܒܸܪܓܼܵܫܵܐ ܝܬܘܿܢ.
• ܗܵܒܼܠܗܘܿܢ ܩܵܐ ܫܲܒܼܪܵܘܟܼܘܿܢ ܚܕܵܐ ܪܓܼܵܫܬܵܐ ܕܐܵܢܝܼ ܐܝܼܬܠܗܘܿܢ ܙܲܒܛܲܢܬܵܐ ܥܲܠ ܚܲܝܲܝܗܝ. ܐܵܦ ܥܒܼܵܕܬܵܐ ܕܦܘܼܣܩܵܢܹܐ ܙܥܘܿܪܹܐ ܡܵܨܝܵܐ ܕܡܲܪܓܼܸܫܵܐ ܠܗܘܿܢ ܕܝܼܢܵܐ ܒܘܼܫ ܙܵܘܕܵܐ ܙܘܼܒܛܸܢܹܐ ܥܲܠ ܚܲܝܲܝܗܝ. ܐܲܝܵܐ ܝܼܠܵܗܿ ܕܝܼܠܵܢܵܐܝܼܬ ܐܵܢܲܢܩܵܝܬܵܐ ܡܼܢ ܒܵܬ݉ܪ ܚܒܼܵܛܬܵܐ ܘܚܲܪܒܲܫܬܵܐ ܕܚܲܕ ܐܘܼܠܨܵܢܵܐ. ܫܲܒܼܪܹܐ ܕܪܵܓܼܫܝܼ ܕܠܲܝܬ ܒܐܝܼܕܲܝܗܝ ܚܲܕ ܡܸܢܕܝܼ ܡܵܨܝܼ ܕܗܵܘܝܼ ܠܗܘܿܢ ܥܝܼܩܘܼܬܵܐ ܕܠܸܒܵܐ ܒܘܼܫ ܙܵܘܕܵܐ.
• ܓ̰ܲܪܒܘܼܢ ܠܵܐ ܗܵܘܝܼܬܘܿܢ ܢܵܛܪܵܢܹܐ ܠܫܲܒܼܪܵܘܟܼܘܿܢ ܙܵܘܕܵܐ ܡܼܢ ܠܵܙܹܡ. ܥܝܵܕܵܝܬܵܐ ܝܠܵܗܿ ܩܵܐܠܵܘܟܼܘܿܢ ܕܒܵܥܝܼܬܘܿܢ ܕܫܵܒܼܩܝܼܬܘܿܢ ܠܵܗܿ ܒܲܝܬܘܼܬܵܘܟܼܘܿܢ ܕܗܵܘܝܵܐ ܩܘܼܪܒܵܐ ܠܐܸܚܕܵܕܹܐ ܡܼܢ ܒܵܬ݉ܪ ܚܲܕ ܐܘܼܠܨܵܢܵܐ. ܐܝܼܢܵܐ ܐܵܢܲܢܩܵܝܬܵܐ ܝܠܵܗܿ ܕܗܲܝܸܪܝܼܬܘܿܢ ܠܗܘܿܢ ܕܪܵܓܼܫܝܼ ܕܕܘܼܢܝܹܐ ܝܼܠܵܗܿ ܚܕܵܐ ܕܘܼܟܬܵܐ ܣܲܠܵܡܲܬ ܕܗܵܘܝܼ ܒܸܚܵܝܵܐ ܓܵܘܘܿܗܿ.

ܪܘܿܬܝܼܢܹܐ ܒܲܝܬܘܼܬܵܝܹܐ ܡܼܢ ܒܵܬ݉ܪ ܚܕܵܐ ܩܲܘܲܡܬܵܐ ܛܘܼܪܵܦܵܝܬܵܐ (ܡܲܫܝܸܡܵܢܬܵܐ)

ܐܵܢܲܢܩܵܝܬܵܐ ܝܠܵܗܿ ܕ:

• ܦܵܝܫܝܼܬܘܿܢ ܒܸܥܒܼܵܕܵܐ ܪܘܿܬܝܼܢ ܪܹܐܙܵܢܵܝܵܐ ܕܕܝܼܵܘܟܼܘܿܢ ܐܲܝܟܼ ܟܡܵܐ ܕܡܸܬܗܵܘܝܵܢܬܵܐ ܝܠܵܗܿ. ܐܵܗܵܐ ܟܹܐ ܝܵܗܹܒܼ ܠܸܒܵܐ ܩܵܐ ܫܲܒܼܪܹܐ.
• ܗܵܒܼܠܗܘܿܢ ܠܸܒܵܐ ܩܵܐ ܫܲܒܼܪܵܘܟܼܘܿܢ ܐܸܢ ܐܵܢܝܼ ܠܹ݂ܐ ܝܢܵܐ ܡܨܵܝܵܐ ܕܡܕܲܒܪܝܼ ܠܪܘܿܬܝܼܢ ܥܝܵܕܵܝܵܐ ܕܕܝܼܲܝܗܝ. ܐܵܗܵܐ ܒܲܠܟܵܐ ܚܵܒܼܹܫ ܗܕܵܪܬܵܐ ܠܡܲܕܪܲܫܬܵܐ ܝܲܢ ܥܒܼܵܕܬܵܐ ܕܫܘܼܓܼ݉ܠܵܢܹܐ ܕܒܲܝܬܵܐ.
• ܪܚܘܿܩܘܼܢ ܡܼܢ ܥܒܼܵܕܬܵܐ ܕܫܘܼܚܠܵܦܹܐ ܐܲܝܟܼ ܪܘܿܬܝܼܢܹܐ، ܡܸܫܬܲܐܠܵܢܘܼܝܵܬܹܐ ܝܲܢ ܣܒܵܪܝܵܬܹܐ ܚܲܕܬܹܐ ܩܵܐ ܕܘܼܒܵܪܵܐ ܕܕܝܼܲܝܗܝ.
• ܚܲܡܹܝܡܘܼܢ ܠܓܲܪܵܘܟܼܘܿܢ ܐܲܝܟܼ ܚܲܕ ܟܡܝܼܠܵܐ ܒܫܸܢܹܐ ܓܵܘ ܒܲܝܬܵܐ. ܐܸܢ ܐܲܚܬܘܿܢ ܓܵܘ ܟܘܼܬܵܫܵܐ ܝܬܘܿܢ، ܐܵܢܲܢܩܵܝܬܵܐ ܝܼܠܵܗܿ ܕܠܵܐ ܬܵܟܼܠܝܼܬܘܿܢ ܥܲܠ ܫܲܒܼܪܵܘܟܼܘܿܢ ܩܵܐ ܗܲܝܲܪܬܵܐ.

ܕܵܐܟܼܝܼ ܠܗܲܝܘܼܪܹܐ ܩܵܐ ܫܲܒܼܪܵܘܟܼܘܿܢ ܕܒܵܣܹܡ:

ܐܵܢܲܢܩܵܝܬܵܐ ܝܠܵܗܿ ܕ:

• ܗܵܒܼܠܗܘܿܢ ܥܸܕܵܢܵܐ ܡܵܠܝܵܢܬܵܐ ܩܵܐ ܫܲܒܼܪܵܘܟܼܘܿܢ ܕܛܲܐܸܠ. ܐܵܗܵܐ ܥܸܕܵܢܵܐ ܒܲܠܟܵܐ ܗܵܘܝܵܐ ܐܲܬܠܝܼܛܘܼܬܵܐ، ܛܲܐܲܠܝܵܬܹܐ ܘܥܵܒܼܘܿܕܘܼܝܵܬܹܐ ܡܘܼܚܸܒܹܐ ܕܕܝܼܲܝܗܝ ܥܲܡ ܚܲܒܼܪܵܢܲܝܗܝ ܝܕܝܼܥܹܐ.
• ܗܵܒܼܠܗܘܿܢ ܥܸܕܵܢܵܐ ܩܵܐ ܚܡܵܠܬܵܐ. ܓܸܚܟܵܐ، ܥܸܕܵܢܵܬܹܐ ܒܲܣܝܼܡܹܐ ܘܚܲܕܘܼܬܵܐ ܫܘܼܪܸܟܬܵܐ ܡܵܨܝܵܢܹܐ ܝܢܵܐ ܕܗܲܝܸܪܝܼ ܩܵܐ ܟܠܲܝܗܝ ܗܲܕܵܡܹܐ ܕܒܲܝܬܘܼܬܵܐ ܕܪܵܓܼܫܝܼ ܒܘܼܫ ܨܦܵܝܝܼ.
• ܕܟܼܘܿܪܘܼܢ ܕܫܲܗܒܼܲܬܵܐ ܕܫܲܒܼܪܵܘܟܼܘܿܢ ܠܡܹܐܟ݂ܘܼܠܬܵܐ ܡܵܨܝܵܐ ܫܲܚܠܸܦܵܐ. ܐܸܢ ܐܵܢܝܼ ܠܹܐ ܝܢܵܐ ܒܸܪܓܼܵܫܵܐ ܕܒܵܥܝܼ ܐܵܟܼܠܝܼ ܒܥܸܕܵܢܵܬܹܐ ܕܐ݉ܟܼܵܠܵܐ، ܗܵܒܼܠܗܘܿܢ ܠܗܘܿܢ ܡܼܢ ܓܹܒܲܝܗܝ ܡܹܐܟܼܘܼܠܝܵܬܹܐ ܩܲܠܘܼܠܹܐ ܒܡܸܬܚܵܐ ܕܝܵܘܡܵܐ.
• ܐܲܟܸܕܘܼܢ ܕܫܲܒܼܪܵܘܟܼܘܿܢ ܕܵܡܹܟܼ ܘܡܲܢܝܸܚ ܩܵܐ ܥܸܕܵܢܵܐ ܡܵܠܝܵܢܬܵܐ.
• ܗܲܝܸܪܘܼܢ ܠܗܘܿܢ ܒܢܘܼܦܵܩܹܐ ܦܲܓܼܪܵܢܵܝܹܐ. ܐܲܝܵܐ ܒܸܕ ܗܲܝܸܪܵܐ ܩܵܐ ܫܲܒܼܪܵܘܟܼܘܿܢ ܐܝܼܡܲܢ ܕܢܲܣܘܼܝܹܐ ܝܢܵܐ ܥܝܼܩܘܼܬܵܐ ܕܠܸܒܵܐ ܘܒܸܕ ܥܵܒܼܕܵܐ ܠܵܗܿ ܕܡܵܟܼܬܲܝܗܝ ܕܗܵܘܝܵܐ ܒܘܼܫ ܨܦܵܝܝܼ.
• ܡܲܒܨܸܪܘܼܢ ܠܟܡܵܝܘܼܬܵܐ ܕܫܸܟܲܪ، ܘܠܡܹܐܟܼܘܼܠܝܵܬܹܐ ܪܲܢܓܵܢܹܐ ܘܠܚܸܠܝܘܼܬܵܐ (ܟ̰ܘܿܟܠܲܝܬ).
• ܗܲܝܸܪܘܼܢ ܠܫܲܒܼܪܵܘܟܼܘܿܢ ܕܦܲܓܼܪܵܢܵܐܝܼܬ ܡܲܢܝܸܚ. ܐܵܗܵܐ ܒܲܠܟܵܐ ܗܵܘܹܐ ܒܚܝܵܦܬܵܐ ܓܵܘ ܗܲܡܵܡ ܫܲܚܝܼܢܵܐ، ܥܒܼܵܕܬܵܐ ܕܡܲܣܵܓ̰، ܗܲܩܲܝܬܵܐ ܕܬܘܼܢܝܵܬܹܐ ܒܥܸܕܵܢܵܐ ܕܕܡܵܟܼܬܵܐ ܘܡܲܙܝܲܕܬܵܐ ܕܚܦܵܩܝܵܬܹܐ.
• ܫܲܚܠܸܦܘܼܢ ܠܥܵܒܼܘܿܕܘܼܬܵܐ ܐܸܢ ܒܸܫܒܼܵܩܵܐ ܝܠܵܗܿ ܠܫܲܒܪܵܘܟܼܘܿܢ ܕܗܵܘܹܐ ܣܩܝܼܕܵܐ ܝܲܢ ܠܗܝܼܩܵܐ. ܩܵܐ ܛܘܼܦ̮ܣܵܐ، ܚܲܕ ܚܘܼܪܙܵܐ ܕܦܪܵܣ ܚܸܙܘܵܐ ܕܫܲܒܼܹܩܠܹܗ ܫܲܒܼܪܵܘܟܼܘܿܢ ܕܗܵܘܹܐ ܢܸܓܵܪܵܢ ܝܲܢ ܙܸܕܥܝܵܐ.

ܐܸܢ ܒܟܠ ܥܸܕܵܢܵܐ ܕܗܵܘܝܵܐ ܐܲܚܬܘܿܢ ܒܸܙܕܵܥܝܵܐ ܝܬܘܿܢ ܒܘܼܬ ܚܘܼܠܡܵܢܵܐ ܕܗܵܘܢܵܐ ܕܕܝܼܵܘܟܼܘܿܢ ܝܲܢ ܕܚܲܕ ܚܲܒܝܼܒܼܵܘܟܼܘܿܢ، ܡܲܚܒܸܪܘܼܢ ܩܵܐ Lifeline ܥܲܠ ܡܸܢܝܵܢܵܐ 14 11 13.

ܐܲܝܟܵܐ ܠܩܢܵܝܵܐ ܗܲܝܲܪܬܵܐ

• GP (ܐܵܣܝܵܐ) ܕܕܝܼܵܘܟܼܘܿܢ
• ܝܵܨܘܿܦܬܵܘܟ݂ܘܿܢ ܕܗܲܨܲܠܬܵܐ ܘܕܚܘܼܠܡܵܢܵܐ ܕܫܲܒܼܪܹܐ
• ܩܸܢܛܪܘܿܢܵܘܟܼܘܿܢ ܡܲܗܲܠܵܝܵܐ ܕܚܘܼܠܡܵܢܵܐ ܕܟܢܘܼܫܬܵܐ
• ܐܵܣܝܵܐ ܕܫܲܒܼܪܹܐ ܝܲܢ ܐܵܣܝܵܐ ܚܲܒܝܼܪܵܐ ܒܡܘܼܚܵܐ ܘܗܵܘܢܵܐ ܕܫܲܒܼܪܹܐ ܘܕܥܠܲܝܡܹܐ ـ ܐܵܣܝܵܘܟܼܘܿܢ ܡܵܨܹܐ ܕܫܲܕܸܪܠܵܘܟܼܘܿܢ
• ܩܸܢܛܪܘܿܢ ܕܦ̮ܝܼܢܸܟܣ ܐܘܿܣܬܪܵܠܝܵܐ ܩܵܐ ܚܘܼܠܡܵܢܵܐ ܕܗܵܘܢܵܐ ܒܵܬ݉ܪ ܛܘܼܪܵܦܵܐܬܹܠܹܦ̮ܘܿܢ5599 9035 (03)
• ܩܸܢܛܪܘܿܢ ܕܚܲܫܵܐ ܘܕܚܲܫܵܐ ܕܦܘܼܪܫܵܢܵܐܬܹܠܹܦ̮ܘܿܢ 066 642 1800

ܐܲܚܬܘܿܢ ܐܵܦ ܡܵܨܝܼܬܘܿܢ ܕܩܵܢܝܼܬܘܿܢ ܢܲܨܝܼܗܲܬ ܡܼܢ:

• Lifeline (ܚܘܼܛܵܐ ܕܚܲܝܹܐ)ܬܹܠܹܦ̮ܘܿܢ 14 11 13
• GriefLine (ܚܘܼܛܵܐ ܕܚܲܫܵܐ)ܬܹܠܹܦ̮ܘܿܢ 745 845 1300
• beyondblue ܬܹܠܹܦ̮ܘܿܢ ܡܸܢܝܵܢܵܐ 4636 22 1300
• Kids Helpline (ܚܘܼܛܵܐ ܕܗܲܝܲܪܬܵܐ ܕܫܲܒܼܪܹܐ)ܬܹܠܹܦ̮ܘܿܢ 1800 55 1800
• NURSE-ON-CALL (ܝܵܨܘܿܦܬܵܐ ܒܥܸܕܵܢܵܐ ܕܛܠܵܒܬܵܐ)ܬܹܠܹܦ̮ܘܿܢ 24 60 60 1300 ـ ܩܵܐ ܩܢܵܝܬܵܐ ܕܡܵܘܕܥܵܢܘܼܬܵܐ ܘܢܲܨܝܼܗܲܬ ܕܚܘܼܠܡܵܢܵܐ ܡܼܢ ܚܲܒܝܼܪܹܐ (24 ܣܵܥܲܬܹܐ ܒܝܵܘܡܵܐ، 7 ܝܵܘܡܵܢܹܐ ܒܫܵܒܼܘܿܥܵܐ)
• ܫܲܘܦܵܐ ܐܸܠܸܟܬܪܘܿܢܵܝܵܐ ܐܘܿܣܬܪܵܠܵܝܵܐ ܕܐܲܒܼܵܗܘܼܬܵܐ ـ raisingchildren.net.au